धोकेबाज परेवा

                                           २०७६/०३/१४

परेवाको जस्तै प्रेम
परेवाको जस्तै जोडी
कस्तो कर्णप्रिय लवज, तर...

परेवा पनि धोकेबाज हुंदारहेछन्
मैले प्रत्यक्ष देखेको छु
म त्यसको साक्षी छु

परेवाको जोडी हुर्कदै थियो
प्रेमको पखेटा लाग्दै थियो
वातावरण प्रेममय हुंदै गयो
प्रेमाकाशमा प्रेमजोडी
परेवाको जस्तै जोडी
कहिले अनन्त आकाशमा बिलाउंथे
कहिले बादल सँग लुकामारी खेल्थे
आफ्नै आकाश थियो
आफ्नै संसार थियो
आफ्नै कल्पनाको प्रेम सागर थियो
त्यही सागरमा प्रेम डुबुल्कि लगाउंथे
सर्वत्र प्रेम थियो
सर्वत्र प्रेमजोडी थियो
परेवाको जस्तै प्रेम
परेवाको जस्तै जोडी, प्रेमजोडी

प्रेम फक्रंदै गयो
प्रेमाश्रय आवश्यक भयो
र एउटा सुन्दर प्रेम गुंड बनाए ती प्रेमजोडीले
प्रेम निशानी स्वरुप
प्रेम अण्ड पलाए
प्रेम ओथारोमा समाहित भयो
प्रेम नकोरलिंदै कालो बादल मडारियो
संसाझै कालो कागले झम्ट्यो
कालरात्रिमा
प्रेमको संसार तहस नहस भयो
परेवा प्रेम खण्डित भयो
प्रेमी परेवा शहीद भयो

एकाबिहानै विक्षिप्त प्रेमिका
आफ्नो खण्डित प्रेमलाई सांच्दै गरेको देखापरिन्
भत्केको गुंडका सिन्काहरु मर्मत गर्न थालिन्
परेवाको प्रेम मरेको थिएन

त्यही दिन
खण्डित प्रेमकि प्रेमिकाले देखिन्
परेवाको अर्को नव जोडीले
त्यही रुखमा आफ्नो प्रेमिल संसार पाए
आफ्नो कल्पनाको प्रेम गुंड स्थापित गरे
उही भावना र उस्तै सपना
प्रेमाकाशमा कैयौं प्रेम डुबुल्कि लागे
यहाँ पनि, परेवाको जस्तै प्रेम थियो
परेवाको जस्तै जोडी थियो
प्रेमजोडी थियो

तर, सबै परेवाको प्रेम परेवाको जस्तो हुंदो रहेनछ
सबै परेवाको जोडी परेवाको जस्तो हुंदो रहेनछ
नव प्रेमी परेवाको मन भरिंदै आयो
नव प्रेमी परेवा खण्डित प्रेमकि प्रेमिका तर्फ लहसियो
नव जोडीमा खटपट शुरू भयो
नव प्रेमी परेवाले हठात् सम्बन्ध तोड्यो
र खण्डित प्रेमिका समक्ष प्रेम प्रस्ताव राख्यो
आफ्नो पुरानो सम्बन्ध पूर्णरूपमा विच्छेद भएको प्रमाण पेश गर्यो
नव प्रेमीको प्रेमहठ समक्ष
खण्डित प्रेमिका पग्लिइन
र आफुलाई समर्पित गरिन्

नव प्रेमिकाको मुटु विस्फोट भयो
तर, उक्त आवाज ऊ बाहेक कसैले सुनेन
आफ्नो प्रेम कायम राख्न प्रयास नगरेकि होइनन्
तर, धोकेबाज परेवाले उक्त प्रेमको मूल्य बुझेन
र प्रेम नफक्रिंदै वली चढ्यो
नव प्रेमिका, परेवाको जस्तो प्रेमको खोजीमा अलप भइन्

सबै परेवाको जोडी परेवाको जस्तै जोडी हुंदैनन्
सबै परेवाको प्रेम परेवाको जस्तै प्रेम हुंदैन
परेवा पनि धोकेबाज हुंदारहेछन्
परेवा पनि नि:स्वार्थ प्रेमका भोका हुंदारहेछन्

तर, परेवा मान्छे जस्ता हुंदारहेनछन्
सम्बन्ध विच्छेद नगरी अर्को सम्बन्ध गांस्दारहेनछन्

(दुई जोडी परेवा पालनको क्रममा रचनाकारले देखेको सत्य घटनामा आधारित रचना) 

यात्रा

                                               २०७६/०३/११

यात्राको संघर्ष
मेरो अर्ध जीवन बाटै शुरू भयो
जब म धकेलिएं सम्पूर्णताको होडमा
करोडौंको भीड थियो तर एक्लो थिएं म
गन्तव्य थाहा थिएन रनभुल्ल थिएं म
कसैले मलाई बिस्तारै थपथपायो मुग्ध भएं म
न्यानो अंगालोमा बेर्यो र सम्पूर्णताको सास फेर्यो
करीब नौ महीने यात्राको सहयात्री बनायो
पृथ्वी भन्ने पहिलो बिसौनी आयो
कैयौं यात्रु ओर्ले कैयौं यात्रु उक्ले
यात्रा निरन्तर चलिरह्यो

धुमिल चेतना साकार हुंदै गयो
मलाई संघर्षमा प्रेरित गर्ने बुवा थिए
पूर्णता दिने ममतामयी आमाले बताइन्
म आमा बुवाको सहयात्री बनें
दोश्रो बिसौनी आउनु पूर्व
दाजुभाई, दिदीबहिनी र ईष्टमित्र पनि देखें
म यात्री घोषित भएं अरुसबै मेरा सहयात्री कहलिए
दोश्रो बिसौनी आयो
कैयौं चढे झरे
यात्रा निरन्तर चलिरह्यो

आफ्नो समूह सहित मुस्कुराउदै झुल्किइन उनी
मेरी सहयात्री बनिन्
र श्रीमती हूं भनिन्
यसैबीच तेश्रो बिसौनी आयो
कैयौं घटे बढे
यात्रा रोकिएन
निरन्तर चलिरह्यो

चन्चल परीहरु देखापरे
मैले मायालु नजरले हेरेको मात्र के थिए
बाबा भन्दै मलाई अंगालो मार्न आइपुगिन्
मेरी छोरीहरु
भेटिए थुप्रै नव युवा युवतीहरु
पुराना अनुहार घट्दैगएको र
नयां अनुहार थपिंदैगएको महसूस भयो
चौथो बिसौनी पनि आइपुगेछ
चढ्ने झर्ने क्रम दोहोरियो
को को चढे झरे पत्तै भएन
तैपनि यात्रा निरन्तर चलिरह्यो

हठात्, मैले सम्झे
मलाई यात्रामा सामेल गराउने बा आमालाई
नजर चारैतर्फ दौडाएं
अहं, देख्दै देखिन
म वहाँहरुको सहयात्री थिएं
तर मैले वहांहरुलाई मेरा सहयात्री सम्झें
भीड़भाड़मा रेखदेख गर्न सकिन वा म बिर्सें
कहाँ कुन बिसौनीमा झरेछन् पत्तै भएन
दु:ख उच्छ्वास
बा आमाले समेत मलाई जनाउ दिएनन्
अर्को बिसौनी आइसकेछ
कैयौं चढ्ने झर्ने क्रम यथावत रह्यो
निरन्तर यात्रा चलिरह्यो

यात्राकै क्रममा पुगियो
नयां ठाउँ, नयां बोली, नौलो रहन सहन
नयां इशारा, नयां भाव, नौलो प्रसंग
छोरीहरुले घोषणा गरे
अब हामी यात्री हजुर सहयात्री
भीड़ बढदै गयो थकान महसूस भयो
फेरी आयो अर्को बिसौनी
आफुले नचाहदा नचाहदै
झर्ने यात्रुको हूलमा म पनि हुत्तिएं
चढ्ने यात्रु मलाई कुल्चदै बढे
यात्रा अगाड़ी बढीरह्यो

जब होश आयो
पृथ्वीमै हो वा अन्य कुनै लोक
सुनसान बिसौनीमा अलपत्र म
चकमन्न अन्धकारमा एक्लो म
उठ्न सक्छु न कसैलाई बोलाउन
मलाई थाहा छ
मलाई कोही भेट्न आउने छैन
मलाई पछुतो रहीरहने छ
मैले मेरा सहयात्रीहरुलाई धन्यवाद दिन सकेन
मलाई मेरो गन्तव्यमा पुग्न सहयोग गरेकोमा

बा आमा छाडेर गए
श्रीमतीको अन्तिम चुम्बन छुट्यो
नाता गोता टाढिए
सहयात्री बाट यात्री र पुन: सहयात्री बनेको
म धकेलिएं र झारिएं
छोरीहरुको यात्रा अविरल चलिरहोस
विनती

मेरो यात्रा विशेष थियो
टिकट न जांचकी
चालक न गन्तव्य
आफुखुशी चढ्न न झर्न पाइने
कसैले चढाउंथ्यो र झार्थ्यो पनि
शायद उक्त यात्रा पूर्णतः स्वचालित थियो
कुनै अदृश्य शक्तिको निर्देशनमा
कसलाई कहां चढाउने र झार्ने
पूर्ण नियन्त्रण शायद उतै थियो

आज म नितान्त एक्लो छु
शायद भीड़भाड़मा पनि एक्लै थिएं
गन्तव्यहीन र दिशाहीन
मूकदर्शक यात्री म
निष्प्राण यात्री म

अन्याय

                                                      २०७६/०३/१०

भक्कानियो मुटु मेरो रक्ताँसु पिउनु पर्ने
चिरिएको कलेजोलाई लुकि लुकि सिउनु पर्ने

पूर्वकै हो दोष यो कि यो जन्म त याद छैन
आफ्नै मुटु तड्पिएको लुकाई पीडा जिउनु पर्ने

अन्जानमै गल्ती भए जस्तो सुकै सजाय पाउँ
आफ्नै मुटु टुक्र्याएको हेरी ओठ सिउनु पर्ने

तड्पिएको थाहा छैन टुक्रिएको थाहा छैन
निर्दोष मुटु खुशी हुँदा जलाई आत्मा रिउनु(रुनु) पर्ने

चाह भए तेरो मनमा न्याय भए तेरो घरमा
टुक्रिएको मेरो मुटु लगाई नौनी लिउनु पर्ने 

बात लागेन

                                                         २०७६/०३/०५

तिम्रै नजरको तीरले म मरें तिमिलाई कुनै बात लागेन
वैंशालु नशा भरपूर थियो तिमिलाई कुनै मात लागेन

तिम्रा खुशी खरीद गर्न सबै रहरहरु धितो राखें
चढाएं आफ्नै वली तिमिलाई कुनै सौगात लागेन

ज्वालामुखी विस्फोट भयो तहस नहस भयो ज़िन्दगी
चर्क्यो मेरै बिचरो मुटु तिमिलाई कुनै औकात लागेन

आंसुहरुको बाढी आयो प्यास बुझाउन मरुभूमिको
तड्पे कल्पे बरबाद भएं तिमिलाई फिका बरसात लागेन

आउने जाने सबले सोधे के भयो तिमिलाई "सुमन"
तिम्रै प्यारमा पागल भएं तिमिलाई सानो मुलाकात लागेन

जीवन खलाँती

                                                            2076/02/19

जिउने आगो फुक्दा फुक्दै भयो जीवन खलाँती
रुने आँखा सुक्दा सुक्दै भयो जीवन खलाँती

रोग दोष राजा देउता सके जति उपचार गरें
विशेक होला ढुक्दा ढुक्दै भयो जीवन खलाँती

छोरा छोरी नाता गोता ज्यू हजुर सलाम ढोगें
रहरहरु थुक्दा थुक्दै भयो जीवन खलाँती

तारा झार्न आकाश ताकी सांझ विहान दौडी रहें
गन्तव्यमा पुग्दा पुग्दै भयो जीवन खलाँती

भकुन्डो झैं सबले ठोके लात हातको सौगात पाएँ
लछ्यहरु चुक्दा चुक्दै भयो जीवन खलाँती

जीवनको रिन तिर्दा तिर्दै सकिएन आजित भएँ
देउता सामु झुक्दा झुक्दै भयो जीवन खलाँती

आफ्नो छाला काढी आफै बनाइदिएं खलाँती
त्यै खलाँती फुक्दा फुक्दै भयो जीवन खलाँती