मनको ज्वालामुखी

                                             २०७६/०७/२५
कालापानी लिपुलेक अनि लिम्पिया धुरामा
सार्वभौम टुटेको छ सिमानाको कुरामा

केचनाकवल मर्चवारी दशगजा र सुस्तामा
कूटनीति चुकेको छ आश्वासन र पुरामा

घमण्ड छैन जसको छाती र पाखुरामा
स्वाभिमान झुकेको छ नेपाली पुर्पुरामा

पहिचान गुमेको छ अस्मिता लुटेको छ
अभिमान सुकेको छ सर्वोच्च टाकुरामा

बारूद होइन मनको महाविस्फोट हुनेछ
ज्वालामुखी लुकेको छ म नेपाली सुरामा

झुकेको स्वाभिमान

                                                      २०७६/०७/२३
कालापानी लिपुलेक अनि लिम्पिया धुरामा
स्वाभिमान झुकेको छ सिमानाको कुरामा

केचनाकवल मर्चवारी दशगजा र सुस्तामा
कूटनीति चुकेको छ जहाँ आश्वासन र पुरामा

घमण्ड नगरे हुन्छ चौडा छाती र पाखुरामा
तिम्रो भन्दा शान देख्छु बहरको त्यो जुरामा

पहिचान गुम्दापनि तिम्रो तातो रगत उम्लिन्न भने
गौरव व्यर्थ छ तिम्रो बुद्ध अनि सर्वोच्च टाकुरामा

बम बारुद होइन मनको महाविस्फोट जरुरी छ
होइन भने उसले परेड खेल्नेछ डोटी अनि बाजुरामा