भन दिलमा के छ?

                                                     २०७६/५/१३
आज धेरै मस्केकि छ्यौ भन दिलमा के छ?
छिन छिनमा झस्केकि छ्यौ भन दिलमा के छ?

आँखा तिम्रा ढलपल ढलपल आवाज पनि भारी
पैले भन्दा खस्केकि छ्यौ भन दिलमा के छ?

छिनमै हाँस्छ्यौ छिनमै रुन्छ्यौ छिनमै कराउँछ्यौ नि
बोली वचन फुस्केकि छ्यौ भन दिलमा के छ?

वारी हुंदा पारी जान्छ्यौ लेक जांदा वेशी
लुसुक लुसुक लुस्केकि छ्यौ भन दिलमा के छ?

दुई हात जोडी विन्ती गरेँ ढक्क फुलेकि छ्यौ
कुन्नी किन ठुस्केकि छ्यौ भन दिलमा के छ? 

पत्तै भएन

                                                        २०७६/०५/११
कैले बालपन वित्यो जवानी कैले पत्तै भएन
आई सकेछ काल सिरानीमा कैले पत्तै भएन

गर्ने मन थियो उनीसंग पेटभरि मनका कुरा
उम्कि सकेछ राम्रो साइत उहिले पत्तै भएन

काम कति थिए शुरू गर्न कति पुरा गर्न
गोधूलि सांझ ढली सकेछ पैले पत्तै भएन

साहु जति सबै आए भेट्ने बहाना गरी
तिर्ने वचन दिएको रैछु मैले पत्तै भएन

कोशिश जति गयो खेर जोगाउन ज्युने दियो
रित्याइ सकेछ सबै तेल उसैले पत्तै भएन

अचम्म

                                                    २०७६/०५/१०
दु:ख गरे दह्रो हुन्छ सुख गरे दुख्छ
कुकुर चांहि लमक लमक हात्ती किन भुक्छ?

आकाशको जून पनि बिना बादल लुक्छ
कुवामा छ ज्वारभाटा सागर किन चुप छ?

फलेको रुख ठाडो छ रे नफलेको झुक्छ
सधैं अचूक मेरो तारो आज किन चुक्छ?

रामनामी साधु पनि बिहान देखि धुक्छ
कोठा भरी सुगन्ध छ लिखे किन थुक्छ?

डांडा कांडा हिन्ने मान्छे कालोपत्रे फुक्छ
हूलका हूल केटालाई केटीले पो ढुक्छ

म कविता लेख्छु

                                                   २०७६/०५/१०
उनले आँखा फिराए म कविता लेख्छु
आँखा बाट गिराए म कविता लेख्छु

मायाको डोरी तान्ने वल गरेकै छु
असत्तीले पिराए म कविता लेख्छु

हरेक दिन सगरमाथा चढीरहेकै छु
चीसोले ठिराए म कविता लेख्छु

कुरूक्षेत्रमा गाण्डीव मैले तानेकै छु
कृष्णले विराए म कविता लेख्छु

राजा हुने दौडमा सामेल भएकै छु
सिंहासनले चिढाए म कविता लेख्छु

हिसाब किताब

                                 २०७६/०५/०६

दुईमा दुई जोडिए चार हुन्छ
दुईले दुई घटाए समाचार हुन्छ

दुईले दुई गुणन गरे चार हुन्छ
दुईले हात समाए घरबार हुन्छ

दुईले सताए अत्याचार हुन्छ
दुईले चिन्तन गरे बिचार हुन्छ

दुईले एकलाई कुटे अचार हुन्छ
दुईले दुईलाई सघाए लोकाचार हुन्छ

दुईले दुईलाई सुनाए प्रचार हुन्छ
दुईले दुईलाई जनाए सञ्चार हुन्छ

दुईले घमण्ड गरे मिथ्याचार हुन्छ
दुईले अपराध गरे व्यभिचार हुन्छ

दुईले सुटुक्क हेरे आँखाचार हुन्छ
दुईले मन नपराए तिरस्कार हुन्छ

दुईले आँखा चिम्ले अन्धकार हुन्छ
दुईले समर्थन गरे सरकार हुन्छ

दुईले टन्न खाए डकार हुन्छ
दुईले गाली खाए हकार हुन्छ

दुईले सुधार गरे परिष्कार हुन्छ
दुईले कराए चीत्कार हुन्छ

दुई अनुशासित भए संस्कार हुन्छ
दुई विभाजित भए बहिष्कार हुन्छ

दुईलाई जिते पुरस्कार हुन्छ
दुई हात जोडे नमस्कार हुन्छ 

पर्खाई

                                            २०७६/०५/०९
सास रहुञ्जेल सम्म तिम्रो सन्देश पर्खें
चाँडै नउठाऊन भनी तिम्रो आदेश पर्खें

शोकमग्न मलामीहरु संग हार गुहार गर्दै
चाँडै नजलाऊन भनी तिम्रो समादेश पर्खें

कसैले हेर्दा पनि मेरो मुटु जल्छ भन्थ्यौ
खरानी हुँदा सम्म तिम्रो आवेश पर्खें

ज्वाला शान्त भयो मेरो चिता सेलायो
जलेको मुटु संगालून भनी परमादेश पर्खें

भरिएर घडामा शान्त छु कुनामा
लान्छौ कि घुमाउन भनी अनिमेष पर्खें 

बाँकि छ

                                       २०७६/०५/०६
छोटो जिन्दगीको हर हिसाब बाँकि छ
तिम्रो मेरो पनि हर हिसाब बाँकि छ

तिमिलाई लाग्योहोला बादल फाटि सक्यो
मुटुको दरार हेर मनमुटाव बाँकि छ

जे भन्नु थियो तिमिले भनि सक्यौ होइन
मन थामेर सुन मेरो सुझाव बाँकि छ

न आत्तिनु जाबो बोतल रित्तियो भनेर
मधुशालामा हेर शराब बाँकि छ

धेरै भएको छैन तूफान शान्त भएको
बाहिर निस्केर हेर बहाव बाँकि छ

धेरै खुशी नहुनु नयाँ युग आयो भनी
आकाश तर्फ हेर टकराव बाँकि छ

घाँटी नहेरी तिमिले हाड मात्र निल्यौ
आफ्नै थालीमा हेर कबाब बाँकि छ

महाभारतको तयारी पुरा भयो भन्थ्यौ
भण्डारमा हेर असबाब बाँकि छ

तिमिले प्रेम प्रस्ताव पठाएर मात्र हुन्न
पर्खी हेर आउने जबाब बाँकि छ

कुन छ?

                                  २०७६/०५/०४

उसको खानामा पनि नून छ
त्यसको पसिनामा पनि नून छ

भन्सार बाट मात्र आउने होइन
उसको धनसारमा पनि सुन छ

उसको तेल मालिसमा मात्र होइन
त्यसको बूट पालिसमा पनि गुन छ

उसलाई बचाउदा मात्र चाहिने होइन
त्ससलाई मार्दा निस्कने पनि खून छ

आकाशमा मात्र उदाउने होइन
दुइ छाक टार्न चाहिने पनि  जून छ

मान्छेमा हराउँदै गएको छ भन्छन्
आत्मा हराएको जन्तु पनि कुन छ?

थोरै माया

                           २०७६/०५/०३

साँचो भए देउ न "सुवा" थोरै माया
मनकि रानी मलाई दिनु कोरै माया

देखाउन सकिन होला सपनाका महल हरु
छाती चिरी हेर्नु दिलको खोरै माया

दुख्यो होला तिम्रो मन मेरो बेहोशीले
योमन छामे हात लाग्ला अघोरै माया

पानी बिना माछा सरि तडपेको छ यो मन
हुन्थो होला शीतल तिमिले दिए थोरै माया

छिन छिनमै नमाग प्यारी प्रेमको प्रमाण
बसिसक्यो अटुटगरी तिमिसंग पोरै माया

साँचो भए देउ न "सुवा" थोरै माया
मनकि रानी मलाई दिनु कोरै माया 

दृश्य बदलिन्छ

                                            २०७६/०५/०२

दिन भरि डमडम डमडम रातमा ताल बदलिन्छ
छिन् छिन् मा मौषमको यहाँ हर हाल बदलिन्छ

खुशी थिए सबै त्यहाँ रंग विरंगी माहौल थियो
जब आए वहांहरु त्यहाँ सबको चाल बदलिन्छ

नियम न कानूनले हुन्छ भन्थे सबले त्यहाँ
क्षण भरमै हुने भयो जब सुनको थाल बदलिन्छ

पक्रिन सकेन उसले सुनौलो त्यो ठूलो माछा
गा-हो छ रे भन्छन् जबसम्म जाल बदलिन्छ

तँ पनि चनाखो नभई भएन "सुमन"
अचम्म छ यहाँ त इशारामा काल बदलिन्छ

बेसहारा भगवान

                               २०७६\०४\२४

बुझिनौ प्यारी शायद अझैछौ अन्जान
तिम्रो लागी बेसहारा भएछन् भगवान - २

छिया छिया हुन्छ मुटु कलेजो चिरिन्छ
ढलपल आँखा नलाउ यता आत्मा नै रेटिन्छ
दोषी पो हुँ कि शायद हो त्यही विधान
तिम्रो लागी बेसहारा भएछन् भगवान

बुझिनौ प्यारी शायद अझैछौ अन्जान
तिम्रो लागी बेसहारा भएछन् भगवान

भाविनी तैंले पनि अपराधै गरीछस
खुशीहरु सबै मेरा सहजै हरीछस
सजाय पो हो कि शायद हो त्यही फरमान
तिम्रो लागी बेसहारा भएछन् भगवान

बुझिनौ प्यारी शायद अझैछौ अन्जान
तिम्रो लागी बेसहारा भएछन् भगवान

मन्दिर धाउँदा पुजारीले गरेछन् बदनाम
भक्तजनले देख्दा देख्दै भनेछन् गुमनाम
समय मलम हो शायद हो त्यही बलवान
तिम्रो लागी बेसहारा भएछन् भगवान

बुझिनौ प्यारी शायद अझैछौ अन्जान
तिम्रो लागी बेसहारा भएछन् भगवान - २