म त NCC को क्याडेट

हिजो सम्म कलिलो विद्यार्थी
आजको म जोशिलो शिक्षार्थी
आमा ! मेरो तस्वीर बदलियो
बाबा ! मेरो परिचय बदलियो
म त युवा, जोशिलो र जांगरिलो क्याडेट
म त, NCC को देश भक्त क्याडेट

उफ्रि उफ्रि कवाज खेल्छु
चमक चमक खुकुरी घुमाउंछु
ते क्वान्दोमा लात हान्छु
एरोबिक्स संगै देश बनाउंछु
म त, इमान्दार र बफादार क्याडेट
म त, NCC को नेतृत्व कर्ता क्याडेट

अबेर सम्म सुत्ने बानी, झिसमिसेमै उठ्न थाले
लाइन लागी खाजा खाई, मैदानमा डट्न थाले
स्याण्ड मोडलको ब्रिफिङ्ग पनि, खडाखडी गर्न थाले
नेता जस्तै फर फर फर फर, भाषण पनि गर्न थाले
म त, राष्ट्रिय एकताको प्रतीक क्याडेट
म त, NCC को अनुशासित क्याडेट

थिएटरको ठूलो हलमा
गेष्ट स्पिकरको लोरी सुन्दा
निन्द्रा देवीको काखमा पुग्दा
सुन्दर भविष्यको मेरो सपना भत्काउँदै
अल्छि क्याडेट ! "नसुत" भन्छ
बोल्न आ को, "नबोल" भन्छ
चल्न आ को, "नचल" भन्छ

भक्ति बाहिनी, रारा गण
"क" गुल्म, नम्बर १ से.मु.
व्यक्तिगत नम्बर, वत्तीस चार सय तीस
परिचय दिंदा दिंदै उठ्छ, भयंकर रीस
तै पनि म, विपद्को स्वयं सेवक क्याडेट
म त, NCC को राष्ट्र भक्त क्याडेट

हिजो सम्म  कलिलो विद्यार्थी
आजको म आंटिलो शिक्षार्थी
आमा ! मेरो तस्वीर बदलियो
बाबा ! मेरो परिचय वदलियो
म त, NCC को स्वच्छन्द क्याडेट
म त, NCC  को देश भक्त क्याडेट
म त, NCC  को नेतृत्व कर्ता क्याडेट
म त, NCC को अनुशासित क्याडेट